Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Енсянь отсӧг

Енсянь отсӧг

KM 9 1

«ВКонтактеын» йӧзӧдӧмаӧсь снимок: Инта ю вомӧн пос вылын кевмысьӧ Воркутаса да Усинскса епископ Иоанн, медым ваыс ямас да оз пӧдты интасаӧс.

Дерт, снимок улас унаӧн заводитӧмаӧсь гижасьны. Кызвыныс сералӧмаӧсь, шуасьӧмаӧсь: «Тадзи позьӧ став гӧрӧдсӧ разьны. Туйяс дзоньтавны. Вежа ваӧн резін, кадилӧӧн тшынӧдін — и выль асфальт...»

И ваыс заводитӧма ямны

Но збыльвылас эмӧсь сэтшӧм молитваяс, кодъясӧс лыддьӧны ыджыд ускӧттьӧысь видзӧм могысь. А Интаын буретш, официальнӧй юӧр серти, ёна ойдӧма. Кызь во нин пӧ татшӧмыс абу вӧвлӧма.

Интаса администрацияысь пресс-служба юӧртӧ, мый тувсов ва улынӧсь Новобольничнӧй да Восточнӧй микрорайонъясса олан керкаяс, дачаяс. Ойдӧминын
уджалӧны спасательяс. Пӧдлалӧмаӧсь Интаса ТЭЦ дорті Юсьтыдорлань мунысь машинаяслы поска туй.

Карса администрация дасьтысьӧма ойдӧм кежлӧ. Чинаяс вичмӧдӧмаӧсь оланін налы, кодъяслӧн керкаыс веськалӧма ытва улӧ. Но йӧзыс пӧ абу окотитӧмаӧсь сэтчӧ вуджны, овмӧдчӧмаӧсь ёртъясыс да рӧдвужыс дорӧ.

Виччысьтӧм лоӧмтор кузя комиссияӧ пырысьяс висьталӧны, мый ставсӧ кутӧны дӧзьӧр улын.

Владыка Иоаннкӧд сёрнитны эг вермӧй. Тыдалӧ, сійӧ ветлӧдлӧ миссионер уджӧн да телефонсӧ пыр кусӧдӧма. Юалі сылӧн уджъёрт Сыктывкарса епископ Питиримлысь, эм-ӧ сылӧн тӧд вылын, кор Енмыс отсаліс кутшӧмкӧ ускӧттьӧ дырйи? Иоаннлӧн кевмысьӧмыс — ритуал али эм надея, мый Енмыс отсалас?

—Стӧч татшӧм лоӧмтор казьтыштны ог вермы, но Енмыс кылӧ кевмысьӧмтӧ. Молитваыд — сыкӧд йитӧд. И та пӧрйӧ сійӧ вермас отсавны, — вочавидзис Владыка Питирим.

Пасъям, официальнӧй юӧр серти жӧ, Инта ю заводитӧма ямны. Июнь 5 лунӧ ваыс усьӧма 39 сантиметр. Вермас лоны, и збыльысь Енмыс отсаліс.

Корӧй, да кыласны

Енлы эскысьяс ёна пыдди пуктӧны Микӧла Чудотворечӧс, коді отсасьӧ йӧзлы. Эм уна висьталӧмтор, кор вежа Микӧлаыд ускӧттьӧысь, ваӧ вӧйӧмысь мездӧма, дзоньвидзалун сетӧма да с.в.

Сідз, Одессаын пирс вылын сулалӧ Микӧла Чудо-твореч нима часовня. Ӧтчыд корабль веськалӧма штормӧ. Веськӧдлыны сійӧн абу нин вермӧмаӧсь, да капитаныс игнасьӧма аслас каютаӧ. Нинӧм пӧ вӧчны сэсся ог вермӧй, пӧдам ставным. Друг пырӧма пӧрысь морт да шуӧма: «Тэныд колӧ кевмысьны — и аски тӧлыс лӧняс, да тэ спаситчан». Асъядорыс и збыльысь лӧньӧма. Экипажыс нимкодясьӧма, ловйӧн кольӧмаӧсь да.

Берегӧ петӧм бӧрын капитаныс мунӧма вичкоӧ. Медым сись ӧзтыны. И син улас усьӧма ӧбраз, код вылын серпасалӧма рытнас волысь олӧма морттӧ. Тайӧ гӧсьтыс вӧлӧма Микӧла Чудотвореч.

Та бӧрын морякъяс кыпӧдӧмаӧсь ас сьӧм выланыс пристаняс Вежа Микӧла Чудотвореч нима часовня.

—Енмыс кӧсйӧ, мед йӧзыс олісны ӧта-мӧдсӧ пыдди пуктӧмӧн да сылы эскӧмӧн, — висьталӧ Сыктывкарса епархияысь секретарь Филипп ай. — Миянлы аслыным Енмыс унаысь дивӧсӧ петкӧдліс, Николай Чудотвореч унаысь нин мездыліс. Коркӧ ӧтчыд туйын машинаным жугаліс. Кӧдзыд тӧв. Вой. Телефон оз уджав. Отсӧг виччысьны некодсянь. И ми кутім кевмысьны Микӧла Угӧдниклы. Тӧдса, сійӧ ветлысь-мунысьӧс видзӧ лёкысь-притчаысь. И друг тыдовтчис машина би югӧр. Сувтіс миян дорӧ. Машинанымӧс домаліс да кыскис. Ме и юалі, мися, кыдзи тэнӧ шуӧны, бур морт? «Николай», — вочавидзис сійӧ.

—Мӧдысь бара туйӧ йӧрмылім, — водзӧ висьталӧ Филипп ай. — Бара жӧ войнас неминучаыс суис. И сідзи жӧ виччысьтӧг миян дорӧ сувтіс автобус. Пытшкас шоперсьыс кындзи некод эз вӧв. Сійӧ миянлы и шуӧ: «Дивуйтчанныд? Со тайӧ вежаыс менӧ ыстіс. Ме сыкӧд дас вит во нин ветлӧдла», — да индіс автобусас ӧшалысь Николай Чудотворечлӧн ӧбраз вылӧ.

KM 9 2

Вежаыд биын оз сотчы

Вежа Мамлӧн «Неопалимая Купина» нима ӧбраз видзӧ пӧжарысь да гым-
чардысь. Сійӧ быд эскысьлӧн керкаын эм. Йӧзыс казьтылӧны унатор, кор ӧб-разӧн вермӧмаӧсь биысь спаситчыны.

Сідз, Кӧрткерӧс районса Ыджыдвиддзысь кывлі татшӧмтор.

—Войнас ӧзйис суседлӧн керкаыс. Асьныс ӧдва уди-тісны петны, узьӧны вӧлӧм да дыр абу казялӧмаӧсь. Кусӧдчысьяс эськӧ зілисны, но биыс сэтшӧм яр вӧлі, ыджыд пу керкаыд тай порок моз ыпнитӧ. Тӧла на вӧлі дай. Матысса керкаяссӧ нин вӧлі биыс чишкалӧ, ведраӧн коясим. Сэсся гӧгӧрвоим жӧ, мый колӧ ӧбразӧн петны. Ставным ас керка водзӧ сувталім да кевмысим, коді кутшӧм молитва тӧдіс. И ӧд тӧлыс лӧнис, биыс енэжас сюръя моз качӧдчис, сэсся кусі. Дерт, пӧжарнӧйяс эз весь сулавны. Но и Енмыс миянӧс кыліс, отсаліс, — эскӧ Валентина Макарова.

Пасъям, кусӧдчысьяс тшӧтш казявлӧмаӧсь, мый керкаыс кушӧдз сотчӧ, а эмӧсь кӧ сэні ӧбразъяс, биыс найӧс оз вӧрзьӧд.

Пӧдӧмаӧс корсьӧ

Ӧбразъяслӧн выныс уна сикас. Сьӧлӧмсянь кӧ кевмысьны, чорыда нёрпалысьӧс чеччӧдас. Вермӧны найӧ индыны и ваӧ пӧдӧмаӧс. Ыджыдвиддзысь жӧ кывлі висьталӧмторъяссӧ.

Орчча Выльыб грездын пӧдас мужичӧй. Суныштас ді вывсянь... Олӧма йӧз туйдасны рӧдвужыслы, Енмӧн пӧ корсьӧй. Лэдзасны пӧдӧминас Мездысьлысь ӧбразсӧ, а сійӧ кутас Висер ю кузя кывтны. Думыштасны, мый эз вермы сэтшӧм ӧдйӧ кылавны шойыс, да ӧбразтӧ бӧр лэптасны васьыс, сӧрӧм пӧ.

Кык лун корсьысясны водолазъяс, но пӧдӧм мортыд оз сюр. Сэсся рӧдвужыс выльысь лэдзасны Ен ӧбразтӧ. Пӧдӧмалӧн вокыс пуксяс пыжӧ да бӧрсяньыс кутас сынны. Кытчӧ сувтас ӧбразыд, сэтысь и лэптасны вӧйӧматӧ. Вӧлӧмкӧ, Выльыбсянь бура ылӧдз кылӧдӧма, сэсся Ыджыдвидз сайын ю чукыляс вужляӧ пысасьӧма.

Вылісянь пас

Кыдзи висьталӧ Коми наука шӧринысь фольклорист Алексей Рассыхаев, татшӧм-сяма казьтылӧмыс комияслӧн уна. Миян пӧль-пӧч пыдди пуктылӧмаӧсь вежаясӧс, кевмысьлӧмаӧсь ӧбразъяс водзын, эскылӧмаӧсь налӧн вынӧ.

—Ӧбразӧн корсьлӧмаӧсь и овмӧдчанін. Шуам, лэдзлӧмаӧсь кывтны ю кузя. Кытчӧ сувтлӧма ӧбразыс, сэтчӧ и вичко кыпӧдлӧмаӧсь, а сэсся сиктыс паськӧдчылӧма. Тадзи кыпалӧмаӧсь и Кӧрткерӧс районса Висер, и Кулӧмдін районса Мыс... — висьталӧ Алексей Рассыхаев.

—Ӧбразъяс вермӧмаӧсь и «ветлӧдлыны», — водзӧ висьталӧ фольклор туялысь. — Шуам, Кӧрткерӧс районса Одыбысь Игӧ аддзӧма Ягвылысь коз улысь Микӧла Чудотворечлысь ӧбразсӧ. Пасъя, Одыб сиктыс кузь, уна грездысь артмӧма. Игӧыд нуӧма сійӧс гортас, амбарас пуктӧма. Мӧд лунас вежаыдлӧн ӧбразыс вошӧма. И бара сійӧ коз улас пӧ куйлӧ. Тадзи куимысь вӧлӧма. Сэсся одыбса мӧвпыштӧмаӧсь, мый тайӧ вылісянь пас, да колӧ сэтчӧ часовня кыпӧдны. Сідзи и вӧчӧмаӧсь. Заводитӧмаӧсь волывлыны Ягвылӧ кевмысьны. Ӧні тайӧ ӧбразыс часовняас жӧ.

* * *

Дерт, кодъяс нинӧмӧ оз эскыны, гашкӧ, и сераласны, сӧрӧм пӧ тайӧ ставыс. Но вичкоын служитысьяс шуӧны, мый вежаяс збыльысь вынаӧсь. Суас кӧ неминуча, висьман, шогӧ усян, колӧ сьӧлӧмсяньыд шыӧдчыны Ен дорӧ кевмысьӧмӧн. Сійӧ быть отсалас. А коді оз эскы сылӧн вынӧ, ыстӧ пикӧ воӧмалы морт мыгӧра анделъясӧс. Николай Чудотвореч, Серафим Саровский да мукӧд вежа олӧны Ен дорын. И кор пӧ налы кевмысян, пыр и висьталасны Енмыслы корӧмтӧ.

Екатерина МАКАРОВА.

 

Добавить комментарий


наверх