Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Чужан лунӧн, Россия!

Чужан лунӧн, Россия!

KM 1

Гажа сьылӧм-йӧктӧмӧн, ордйысьӧм-ворсӧмӧн, уна сикас выставка-петкӧдчӧмӧн пасйисны юркарсаяс да налӧн гӧсьтъяс Россиялысь лун, а сідзжӧ Сыктывкарлы 237 во тырӧм.

Июнь 12 лунӧ гажыс пансис предприятие-организацияын уджалысьяслӧн парадӧн: «Пармасянь» Театр изэрдӧдз збоя да кыпыда шалсйисны-восьлалісны бурдӧдысьяс, велӧдысьяс, культураын зільысьяс, юркарса гырысь и посни предприятиеясын уджалысьяс. Накӧд ӧти радын войтырлӧн ёртасян парадӧн мунісны землячество-автономияын водзмӧстчысьяс да Сыктывкарса университетысь студент-иностранечьяс.

KM 1 2

Театр изэрд вылын чукӧртчӧмаясӧс чолӧмаліс республикаса Юралысь Сергей Гапликов, коді пасйис, тайӧ пӧ луныс тӧдчана Россияын став олысьыслы, кодъяс сьӧлӧмсяньыс радейтӧны Аймусӧ.

–Талун миянлы мойвиис, ӧд поводдяыс быттьӧ тшӧтш нимкодясьӧ миянкӧд да козьналӧ ассьыс
шоныдсӧ, – содтіс Сергей Анатольевич.

Куимысь «Ура!» горӧдӧм бӧрын парадын мунысьяс лэдзисны сӧстӧм лӧз енэжӧ уна рӧма шаръяс. Та бӧрын нимӧдісны юркарса олысьясӧс, кодъяслы сетісны «Сыктывкарса почёта гражданин» ним.

Сэсся куим час йӧзӧс гажӧдісны «Город талантов» проектӧ пырӧдчысь сьылысь-йӧктысьяс. Петкӧдчис матӧ 30 артист. Концертсӧ заводитісны республикаын нималана сьылысь-яс Ольга Сосновская да Владимир Юрковский. Сэсся петкӧдчисны артистъяс, кодъяс вӧчӧны ыджыд сцена вылын «медводдза на воськовъяс». Концерт помас ставныслы вичмис диплом да бур козин.

KM 1 3

А сэсся ставӧн мӧдӧдчисны Коммунистическӧй уличаӧд Степан изэрд вылӧ. Улича пӧлӧн найӧс виччысисны пӧжасӧн, пражитӧм яйӧн да быдсикас сувенирӧн вузасян палаткаяс. Матӧ кызь мастер ошйысис-петкӧдчис ас киӧн вӧчӧмторнас: бисерысь кыӧм сикӧтш-исергаӧн, кӧртысь вӧчӧм кань-понйӧн, мойд-мультфильм-са уна сикас дӧра-аканьӧн.

Шӧр бассейн дорын юргис «Яркий город» фестиваль, кӧні чукӧртчӧмаясӧс гажӧдісны республикаса да юркарса ансамбльяс. Тані жӧ вӧлі паськӧдӧмаӧсь сідз шусяна фотозона, мастер-класс да конкурсъяс. А бокынджык нуӧдісны «Нимлуна пирӧг» конкурс, кӧні позис чӧсмасьны пӧжасӧн да юыштны юмов пӧсь тшай.

KM 10 1

Сыктывкарысь, районъясысь да землячествоясын водзмӧстчысь бур кӧзяйкаяс пӧжалӧмаӧсь шензьӧдана пирӧгъяс: кодкӧ няньысь вӧчӧма анделӧс, а кодкӧ сукарысь «кыпӧдӧма» юркаршӧрса стеласӧ. А чӧскыд дук вӧснаыс конкурс вылӧ волысьяс муртса кывнысӧ эз ньылыштны. Мыйыс сӧмын сэні эз вӧв: капустаа пирӧг, пув-чӧдъя пӧжас, банйӧм кӧвдум, картупеля шаньга...

KM 10 2

Конкурсса жюри, кытчӧ пырисны Коми культура шӧринын да Сыктывкарса администрацияысь культура юкӧнын зільысьяс, вермысьӧн шуис Наталья Листопадоваӧс, а котыръяс пӧвстысь медводдза места шедӧдіс «Русь» ансамбль.

А сэккості Степан изэрд вылын мужичӧйяс лэпталісны гира да кыскалісны 9 тоннаа ыджыд машина. Спорт радейтысьяслы сэні нуӧдісны сідз шусяна силӧвӧй экстрим кузя ордйысьӧм. Сыктывкарӧ венласьны воӧмаӧсь вӧлі Ухтаысь, Санкт-Петербургысь, Ярославльысь да Донецкысь спортсменъяс.

Силӧвӧй экстримысь республикалӧн кубок вӧсна ордйысьысьяс лэпталісны 110 да 130 килограмма кер, 140 килограмма штанга, 90 килограмма гантель (бӧръясӧ коліс лэптыны ӧти киӧн нин). Эз быдӧн вермы 90 секундӧн венны эстафетасӧ, но найӧс горзӧмӧн ышӧдісны ордйысьӧмсӧ видзӧдысьяс. Сӧмын Сергей Романчуклы тайӧ удайтчис. Таӧдз сійӧ кыкысь нин нулӧма Комиысь кубоксӧ Донецкӧ.

KM 10 3

Сэсся багатыръяс босьтчисны гезйӧн кыскыны 25 метр ылнаӧдз грузӧвӧй машина. Медӧдйӧ тайӧ вӧчис бара жӧ Сергей Романчук. Та бӧрын мужичӧйяс паськыд пельпом выланыс нуисны 400 килограмм сьӧкта карнан, а бӧрынджык котӧртӧдлісны 140 килограмма кык чемодан да путкылялісны трактор кӧлеса. Сідз шусяна «фермерлӧн эстафета» эз жӧ кокньыда сетчы.

А сэсся спортсменъясӧс виччысисны 125-205 килограмм сьӧкта шаръяс. 60 секундӧн коліс лэптыны бӧчка вылӧ 5 шар. Медводдзаясыс кӧ кыпалісны кокньыда, бӧръясӧ гоз-мӧдӧн сӧмын и вермисны лэптыны.

KM 10 4

Сергей Романчук бара на петкӧдліс ассьыс вынсӧ да коймӧдысь нин нуис миян республикалысь кубоксӧ Донецкӧ. Сыысь муртса кольччис Ухтаысь Сергей Стрекаловский. Коймӧдӧн лоис Санкт-Петербургысь Артём Тарасов.

Тайӧ лунас Сӧветскӧй улича лоис пода мортлы ветлан туйӧн. Тані вӧлі паськӧдчӧмаӧсь республикаса МЧС-лӧн, Национальнӧй библиотекалӧн да мукӧд организациялӧн сідз шусяна тематическӧй площадкаяс. Кусӧдчысьяс тӧдмӧдісны асланыс важся техникаӧн, библиотекаын зільысьяс вӧлі восьтӧмаӧсь «Ленинка» некафе, кӧні нуӧдісны томуловлы ворсӧмъяс да мастер-классъяс. Тані жӧ вӧлі сувтӧдӧма ыджыд сцена, кысянь петкӧдчисны юркарса художественнӧй самодеятельнӧй коллективъяс.

KM 10 5

Праздник кежлӧ Киров нима парк шуисны «турунвиж зонаӧн» да ставнас сетісны экологъяслы. Вӧр-ва видзӧм могысь общественнӧй котыръясын водзмӧстчысьяс нуӧдісны экоквестъяс, конкурсъяс, ышӧдісны йӧзӧс торйӧдӧмӧн чукӧртны стеклӧ-пластик. Зонпоснилы, дерт жӧ, медся ёна воис сьӧлӧм вылас «контактнӧй зоопарк», кӧні найӧ малалісны кроликъясӧс, крыса-шыръясӧс, кӧзаӧс да уна мукӧд пемӧсӧс. «ЭкоАрт» площадка вылын вӧлі воссьӧма дизайнеръяслӧн выставка, кӧні быдӧн вермис тӧдмасьны экологиялы сиӧм уджъясӧн. Бокынджык эновтӧм кань-понйӧс дӧзьӧритан приютын водзмӧстчысьяс вузасисны ас вӧчӧм чачаясӧн, нуӧдісны челядьлы конкурсъяс. Тані жӧ эжа вылӧ пуксьӧмӧн йӧзыс кывзісны вӧр-ва видзӧм кузя лекция.

KM 11 1

Россиялӧн лунӧ республикаын медводдзаысь муніс духӧвӧй инструментъяслӧн концерт. Киров нима паркын юргис вальс, военнӧй марш да выль аранжировкаын шылад. Унаӧн сэні жӧ йӧктісны, ӧд эз вӧв сэтшӧм морт, кодлысь эськӧ музыкантъяс эз вӧрзьӧдны сьӧлӧмсӧ.

Парклӧн дзоньталӧм-шыльӧдӧм берег вылын петкӧдчис Россияын медбур канатоходец, «Минута славы» программаын снимайтчысь Эдуард Мустафаев. Дагестанысь воӧм мужичӧй эз сӧмын ветлӧдлы гез кузя, но и чеччаліс сы вылын, куйліс да йӧктіс лезгинка. 50 арӧса артист сідзжӧ ветлӧдліс гез кузя синсӧ кӧрталӧмӧн, журъяліс велосипедӧн, исласис таз вылын. Ставсӧ тайӧс сійӧ вӧчис страховкатӧг.

Рытланьыс, кор юркарса уличаяс надзӧникӧн кутісны кушмыны, Степан изэрд вылӧ чукӧртчисны «кӧрт чибӧяс» вылын спорт да дзоньвидза оласног радейтысьяс. «Велоночь» муніс витӧдысь нин и таво чукӧртіс 5 сюрс сайӧ мортӧс. И йӧзыс збыльысь вӧлі тшем. Кор изэрд вылысь вӧрзьӧдчис бӧръя велосипедыс, колонналӧн «юрыс» кытшовтіс нин Сысольскӧй шоссе, тӧвзис Морозов, а сэсся и Димитров уличаӧд.

* * *

Россиялы да юркарлы сиӧм кыпыд гажыс помасис Театр изэрд вылын, кӧні юркарса олысьясӧс да гӧсьтъясӧс чолӧмаліс нималана сьылысь Валерия. Артисткаӧс кывзыштны чукӧрмис матӧ вит сюрс морт, и кыдз шуласны йӧзыс, яблӧглы усьнысӧ вӧлі некытчӧ. Валерия сьыліс быдӧнлы нин тӧдса да радейтана сьыланкывъяс, сідзжӧ и ассьыс выль петасъяс.

KM 11 2

KM 11 3KM 11 4

KM 11 5

KM 11 6

KM 11 7

Павел КОРОЛЁВ.

Снимокъясыс авторлӧн.

 

Добавить комментарий


наверх