Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Усьӧм лыдпас

Усьӧм лыдпас

khatanzeyskiy

Лов кыпӧдана юӧр!.. Али абу лов?.. Энлӧй. Стӧча кӧ шуны, экономика кыпӧдан юӧр. Тадзтӧ бурджык. И сідз...

А мый йылысь нӧ ме?.. Отпускалӧм водзад тадзи и эм – чемоданын кӧть юрын, ставыс гудыр-гадыр...

Генпрокуратуралӧн артасьӧм серти, кольӧм во Россияын взятка сетӧм-босьтӧм чинӧма быдса 17,2 прӧчент вылӧ: 2015 воын кӧ оланпастӧ торкӧмаӧсь 6.399 морт, 2016-ӧдын – 5.297. Сӧмын!..

Тайӧс гижигӧн на пельӧдз воӧ тіян кекӧначасьӧм. А мый нӧ сэтшӧм жебиника клопайтанныд? Али киныд гӧна, да оз сэтшӧм гораа кыв?.. Шмонита! Роддомысь кага босьтігӧн еджыд халаталы шампанскӧй доз да кампет кӧрӧб сетӧмыд калым ӧмӧй?! Да и детсадйӧ дзолюкӧс иналӧмысь завлы коньяк-шоколадыд абу взятка!.. Нинӧм соссьыны, подъезд кодьын ва тупкӧмысь сантехниклы сетінныд куимсё чӧлкӧвӧй. Но тайӧ ӧд йӧзыслы бур вылӧ! Мед патераысь кран вежигкості улі судтасаӧс не пӧдтыны... А мый профессор зачёт пуктӧмысь тшӧктіс сылысь методичка ньӧбны? Да тадзи ставӧн вӧчӧны...

Муртса эг шу: со кодлысь велӧдчыны колӧ! Кольӧм вежонӧ арестуйтӧмаӧсь Курск обласьтса вице-губернатор Василий Зубковӧс. Вӧлӧмкӧ, стрӧитчан фирмаын директорӧс вежысь козьналӧма чинаыдлы «бур кыв-йысь»... гараж. Доныс сылӧн 1 миллион шайт. А со Саратов обласьтса Энгельс карысь вӧвлӧм прокурор Владимир Зубакин предпринимательясӧс «шоныд борд» улас видзӧмысь босьтӧма абу сӧмын сьӧм, но и... курыдтор. Дас сюрс шайт дон 4 ящик водка... А закускатӧгыд нӧ кыдзи?! Чувашияса ГИБДД-ын отделӧн веськӧдлысь лэдзӧма руль сайӧ медосмотртӧг фермерӧс. Мӧдыд сэсся «аттьӧалӧма» погонатӧ тшынӧдӧм калбасӧн да чипанӧн... Тываса колония-поселениеысь начальниклы кынӧмсӧ тыртны ковмӧма... вит ыж. А вайӧма найӧс дзескыдінын пукалысь, гортас гусьӧн ветлӧмысь... Оз сӧмын рушкуаӧс черинад, вӧлӧм, номсӧдлы. Тайӧ лунъясӧ судитӧны Копейскысь вӧвлӧм мэр Вячеслав Истоминӧс. Карса бизнесменъяс некымын во могмӧдӧмаӧсь сійӧс яйӧн, сырӧн, фруктыӧн да чими-осётрӧн...

Комиын адгоршыд эм жӧ. Со неважӧн Сыктывкарса ёрд йӧршитӧма дзескыдінӧ 4,5 во кежлӧ республикаса тариф службаӧн вӧвлӧм веськӧдлысь Илья Перваковӧс. 10,2 миллион шайта взятка кындзи сылы вичмӧдӧмаӧсь суйӧр сайын вӧчӧм снегоход да вештӧмаӧсь 320 квадрат-метра патералысь дон юкӧн...

Калым босьтысь-сетысьыд ӧні сюсьмӧма. Сьӧмӧн гежӧда нин дурӧны. А мӧд ног налысь вывтіасьӧмсӧ эрдӧдны погона абу на велалӧмаӧсь. Сідзкӧ, и отчёт лыдпасъясныс чинӧны да-й прокуратуралӧн юӧрыс страналысь экономика ни миянлысь лов, тыдалӧ, оз на кыпӧд.

Григорий ХАТАНЗЕЙСКИЙ.

 

Добавить комментарий


наверх