Мынтасны оз шойччыны ветлан туйсö?

«Коми му» газет редакцияö шыöдчис Сыктывкарысь Александр Михайлов да висьталіс, мый зільö ас вылас уджалысьлöн предприятиеын, лöсьöдчö петавны отпускö да ветлыны шойччыны саридз дорö.

Александр юасьö, удж вывсяньыс вештасны оз сылы   туйсьыс рöскодсö?

Вочакывсö сетігöн медвойдöр пасъям, мый тавося кос му (апрель) тöлысьын пыртöма веж-сьöмъяс «О государственных гарантиях и компенсациях для лиц, работающих и проживающих в районах Крайнего Севера и приравненных к ним местностях» федеральнöй оланпасö да РФ-са Удж кодексö.

На серти, 2014 вося кос му (апрель) 13 лунсянь йöзöс уджöн могмöдысьяслы быть колö мынтыны аслас уджалысьяслы отпуск дырйиыс шойччыны ветлан туйысь рöскодсö.

Республикаса предприятиеын зільысьяс вермасны кык вонас öтчыд налы удж сетысь весьтö ветлыны шойччыны, но та дырйи налы вештасны туйсö сöмын миян страналöн границаясöдз да бöр.

Тайö правоыс сетсьö мортыслы отпускö петігас медводдза воас нин. Сiдзжö туйысь рöскодыс мынтыссьö сылöн гöтырыслы, оз кö уджав, да челядьыслы, налы кö абу на 18 арöсыс. Уджöн могмöдысь сiдзжö мынтысяс багаж нуöм-вайöмысь.

Мынтыссьö туйыс и сэк, кор уджалысь ветлö шойччыны аслас машинаöн. Та дырйи рöскодыс   артавсьö медся дженьыд туйсö   тöд вылö босьтöмöн. И сьöмсö сылы позьö корны ылöсалöмöн туйö петтöдзыс на. Стöчасö вештысясны воöм бöрас нин билетъяс да мукöд колана кабала сертиыс.

Нöшта öтчыд тöдчöдам: оланпасын урчитöма, мый ставöн, кодъяс уджалöны войвылын, кык вонас öтчыд вермасны босьтны миян странаса мукöд обласьт-республикаö шойччыны ветлан туйысь сьöм. Водзті татшöм правосö вöлі сетöма сöмын налы, кодъяс уджалісны бюджет организацияясын, шуам, школа-садйын, культура керкаын. Мукöдлаын зільысьяслы сьöмсö мынтылiсны сöмын сэк, кор тайöс вöлі урчитöма сідз шусяна коллективнöй договорын.

Öні жö йöзöс уджöн могмöдысьлы быть колö кырымавны такöд йитöдын колана кабаласö.

Сідзкö, Александрлы колö шыöдчыны удж сетысь дорас, и, сiйö кö оз кöсйысь мынтысьны туйсьыс, – прокуратураö либö судö, кöні сылы отсаласны оланпас вылö подуласьöмöн нин.