И бара на эмбур юкöм йылысь

«Коми му» газетлöн кольöм вежонся номерын «Юав – вочавидзам» рубрика улын гижöдыс вöлі сiдз шусяна брачнöй договор йылысь.

–А позьö оз киритны гозъя костын татшöм сёрнитчöмсö? – окота лоöма тöдны Сыктыв- карысь миянлысь газет лыддьысьлы.

Сетам и сылы вочакывсö.

Брачнöй договорсö позьö вежны либö киритны кырымалöм бöрас кöть кор, гозъя кö кыкнанныс талы абу паныдöсь. Та могысь бара на ковмас шыöдчывны нотариус дорö, мед вынсьöдас кабаласö аслас кырымпасöн.

Но сэк жö оз позь, мед та дырйи кутшöмакö лои кедзовтöма верöссö либö гöтырсö. Шуам, гозъялöн юксигöн верöсыслы вичмö керка, дача, гараж да машина, а гöтырыслы – сöмын öти жыръя патера, мед кöть и тадзи урчитöма мöдысь дасьтöм брачнöй договорас. Татшöм кабаласö позьö киритны, шуны рочöн кö, недействительнöйöн.

Татшöм кабала сертиыс гöтырлы либö верöслы оз вермы вуджны öта-мöдсяньыс сэтшöм эмбур, кодöс колö регистрируйтны (шуам, патера, керка либö машина). Та могысь колö кырымавны эмбурсö козьналöм йылысь торъя договор.

Семьялöн кодекс серти брачнöй договорсö позьö киритны (шуны недействительнöйöн) судö шыöдчöмöн сэк, кор:

–тайö документыс оз лöсяв оланпаслы;

–сійöс кырымалöма мода вылас (мнимая сделка) либö тайö договорнас саймовтöма татшöмсяма мöд документ («притворная сделка»);

–договорас кырымпассö пуктöма сідз шусяна недееспособнöй морт да с.в.

Брачнöй договорсö кырымалöм бöрас кö гозъяысь кодарыскö гöгöрвоас, мый пöлыс сійöс ылöдлöма, то кабаласö киритöм могысь сійö вермас шыöдчыны судö.