А ковмас кö юксьыны?

Миян редакцияö шыöдчис том нывбабакодöс суöма юрист дорö мог. Ас йывсьыс висьтасьны эз окотит. Но, кыдз тыдовтчис, аньыс лöсьöдчö петны верöс сайö. Верöспуыс пö эськö быд боксянь бур. Но код тöдас, век жö майшасьö нывбаба, кыдзи мый ладмас сыкöд öтувъя олöмыс. Гашкö пö, коркö и торйöдчыны ковмас.

–А позьö оз верöс сайö петігöн кырымавны кутшöмкö кабала-документ, кöнi мед водзвыв вöлі урчитöма, юксьöм бöрас кодлы мый да уна-ö вичмас, босьтны кö тöд вылö патера-машина, мукöд эмбур   да банкын сьöм? – юасьö нывбаба.

Кыдзи и пыр, и тайö юалöм вылас вочавидзö миян «Коми йöзöдчан керкаöн» веськöдлысь, юристлöн диплома Вячеслав Васильевич Попов.

–Позьö кырмавны сідз шусяна брачнöй договор. Тайö – гозйöдчысьяслöн öти кывйö воöдчан документ, кöні урчитöма сійö либö мöд эмбурöн вöдитчöм вылö öтлаын олiганыс и торйöдчöм бöрас налысь правояссö, а сідзжö öта-мöд водзас могъяссö .

Кодi вермас кырмавны брачный договорсö? Семьялöн кодекс серти, татшöм документсö вермасны кырмавны найö, кодъяс шыöдчöны ЗАГС-ö öтлаасьöм могысь. Кырымавны позьö и öтлаын нин олiгöн. Но быть колö вынсьöдны нотариуслöн кырымпасöн да печатьöн.

А кор брачнöй договорыс кутас збыльмöдсьыны?

Татшöм кабалаыс, кырмалöма кö сійöс öтлаасьöм водзвылын, кутö «уджавны», кор гозъя гижсьöны ЗАГС-ын. Договорсö кö кырмалöмаöсь гöтрасьöм бöрас, то кабалаыслöн оланпас выныс лоас сэк, кор сэтчö ассьыс кырымпассö пуктас нотариус. Та могысь сы дорö колö волыны гозъялы кыкнанныслы.

Мый позьö гижны-урчитны брачнöй договорас? Тайö документас позьö гижны гозъя костын, гозъя да налöн челядь костын эмбур юкöм йылысь.

Семьялöн кодекс серти, став эмбурыс, кодöс гозъя нажöвитöны öтлаын оліганыс, лоö налöн öтувъяöн. И торйöдчиганыс тайö эмбурсö ковмас юкны шöрипöв. А брачнöй договорын позьö урчитны, мый патераыс – верöсыслöн, а керкаыс – гöтырыслöн, и юксиганыс патераыс коляс верöсыслы, а керкаыс гöтырыслы.

Олöмыс зэв аслыспöлöс, и вермас лоны быдтор, весиг мый он куж думыштлыны. И öтлаасиганыд кö майшасянныд сійö либö мöд эмбур кузя, то колö кырымавны татшöм кабаласö. Тайö лоас сiдз шусяна «страховкаöн», кöть эськö и бурджык, оз кö ковмы сійö гозъялы.