Колö öдйöджык бöр босьтны

«Коми му» газет редакцияö шыöдчис Кöрткерöс районысь Алексей Петров да висьталiс, мый во сайын сылысь важиник мотоциклсö мырддьöмаöсь полицияын уджалысьяс, абу вöлöма сылöн правоыс ни мотоцикл вылö колана кабалаыс.

Алексей вештöма таысь ыджыд штрап, а мотоциклсö нуöмаöсь штрафстоянка вылö. Чайтöма Алексей, мый мынöма ставсьыс, öд мотоциклыс сылы оз нин вöлöм ков. Но неважöн воöма письмö, кöнi штрафстоянкаöн веськöдлысь корöма мынтыны сё сюрс сайö шайт, мотоциклыс пö пыр на сэнi сулалö да.

Алексей юалö, збыльысь-ö колö сылы мынтыны та мында сьöмсö.

Вочавидзам. ГИБДД-ын   уджалысьяс кö кутасны шоперöc гажа юрöн либö правотöг руль сайын пукалöмысь, то вермасны мырддьыны сылысь машинасö либö мотоциклсö.

Оланпас серти, полицейскöйяслы та дырйи медводз колö мыж вöчысьсö «отстранить от управления транспортным средством» и та бöрын гижны «протокол о задержании транспортного средства». Сэсся машинасö нуöны торъя стоянка вылö, кöнi уджалысьясыс виччысьöны, кор мортыс ваяс колана кабалаяс да бöр босьтас ассьыс машинасö.

Сэк жö сылы ковмас мынтыны машинасö (мотоциклсö) торъя автостоянка вылас вайö-мысь да сэнi видзöмысь сьöм. Донсö урчитö Коми Республикаса тариф служба. Мотоцикл видзöмысь быд часысь колö вештыны 12 шайт 50 ур (НДС артышттöг) да 14 шайт 75 ур (НДС-нас). Сiдз, мотоциклсö тöлысь видзöмысь ковмас мынтыны 10.620 шайт. Машина видзöмыс сувтас донаджык.

Кыдзи тыдовтчис, редакцияö шыöдчысь Алексей Петровлы воöма сiдз шусяна «претен-   зионнöй письмö», мед мыжа мортыс ачыс мынтiс сьöмсö. Оз кö, сылы судын нин ковмас дорйысьны. Унджыкысьсö суд тшöктö мынтыны сьöмсö.

Кыдз аддзам, Алексейлы зэв нин уна «каттьöма» мотоциклсö штрафстоянкаын во чöж ви-дзöмысь сьöмыс. Ковмас, дерт, вештыны, но, чайта да, колö сылы шыöдчывны юрист дорö, мед видзöдлас та кузя кабалаяссö да, гашкö, вермас мыйöнкö отсыштны мортыслы, кöть нин мед этшаджык ковмис вештыны сьöмсö.

А «Коми му» газет лыддьысьяслы казьтыштам, мый мырддисны кö нин тiянлысь машинатö полицейскöйяс, то кымын водзджык босьтанныд ciйöс штрафстоянкасьыс, сымын этшаджык сьöм ковмас мынтыны сэн видзöмсьыс.

Вячеслав Попов.