Сöмын во джын мысти

KM-4

«Коми му» газет редакцияö шыöдчис Мылдiн районысь олöма мужичöй да юксис аслас шогöн. Неважöн сылöн кувсьöма пиыс. А сэсся недыр мысти нин мужичöйлы мобильнöй телефон пырыс кутöма воавны банксянь СМС-ка, медым сійö вештас пиыслысь кредит. Но мужичöйлöн та кузя некутшöм кабала абу, и сiйö оз тöд, мый вöчны.

Сетам сылы вочакыв.

Кор мортыс кувсьö, матыссаясыслöн эм во джын, медым шыöдчыны нотариус дорö наследство босьтöм могысь. Нотариус сöмын тайö кад кольöм бöрас вермас висьтавны кув-сьöмалöн рöдвужыслы, кодлы мый вичмö.

Кытчöдз сылöн бать-мамыслы, гöтырыслы, мукöд матысса рöдвужыслы оз ло сетöма наследство вылö право, некутшöм сёрни оз вермы лоны уджйöзсö вештöм йылысь. Сэк жö, кор наследникъяслы вичмас кувсьöмалöн эмбурыс да мукöд озырлуныс, налы ковмас ас выланыс босьтны и сылысь уджйöзсö, тшöтш и банкысь кредитсö.

Но танi колö кутны тöд вылын со мый. Наследствоыс кö артавсьö 100 сюрс шайт дон, а банклы кувсьöмалöн уджйöзыс 1 миллион шайт, оланпас серти наследникъяс вермасны сетны кредиторыслы сöмын 100 сюрс шайт. Дерт, ас кöсйöм сертиныс вермасны мынтыны и дзоньнас кредитсö.

Та дорö содтöд колö висьтавны, мый уджйöз перйöм кузя кредитор вермас шыöдчыны судö, кöні и кывкöрталасны, кодлы да уна-ö ковмас мынтыны.

Сідзкö, миян редакцияö такöд йитöдын шыöдчысьлы оз ков майшасьны кувсьöм пиыслöн уджйöз понда. А кутасны кö и водзö дöзмöдчыны банксянь, казьтыштны сэтчöс кредиторъяслы, мый найö торкалöны оланпас.

Вячеслав Попов.