Сьöм ради ог на «вижöдöй»

khatanzeyskiy

Кодыр карсалöн пошта кудъясö мöдісны дон босьттöг чöвтавны газет, йöзыс радлісны: тані пö и телепрограмма, и лыдтöм-тшöттöм юöр, и шемöсмöдана выльтор!.. Буретш весьöпöртана гижöдъяснас и ылöдліс челядь мывкыда лыддьысьысьöс аслас налькйö наянысла «вижöдöм» пресса.

Кольöм вежонö татшöм СМИ-ясысь öти — «Про город» газет — йöзöдіс Эжваысь 2 арöса Надя Касеваöс виöм да гуалöм йылысь статья. Сэні жö — ньöти ретушируйттöм снимок, кöні коньöр нывкакöд орччöн пукалö том морт. Бöръясö газетын «зільысьяс» пасйöмаöсь Надюклöн батьöн: тайö пö яндысьтöм синмыс юöма кагаöс гуалан став сьöмсö.

И колö öд лоны, мый снимокысь «батьыс» збыльвылас дзик мöд морт! Олö-велöдчö Санкт-Петербургын, семья-челядь абу на лöсьöдлöма дай Эжваса шог йывсьыс весиг пель рöчнас абу кывлöма. Но видлы эскöдны тайöс Комиын олысь рöдвуж-тöдсаыслы! «Про город» со мый юöртö да...

А газетыдлы йöзыс пыр эскылісны, сы вöсна мый буретш сэтысь найö коркö тöдмавлісны Октябрса революция, Ыджыд тыш, Победа, Гагарин йылысь юöръяс. Журналист воккöд öтув юкисны курыд шогсö да юмов радлунсö. Воясöн тайö öтувъялуныс, ёртасьöмыс пыр вынсяліс-ёнмис. Лыддьысьысьлöн весиг дум эз вöв, мый коркö газетса вермас ылöдлыны сійöс.

Рочьяс абу весь шулöмаöсь налькйын сыр йывсьыд. Та пöрйö сідзи жö артмис: мораль да этикалысь став корöмсö кедзовтöмöн «сенсация» бöрся кыйöдчысьяс лэдзисны ру. Окота эськö мöд ногöн тайöс нимтыны, да ог нин... Асьныд гöгöрвоанныд.

Содта сöмын, «виж висьöмöн нёрпалысь прессаыд» кöть вöзйö асьсö дон босьттöг, такöд тшöтш гусьöн сюйö кос кисö лыддьысьысьлöн зептö. Да нöшта ыдждöдлö асьсö журналистикаöн. Чöв! Прамöй журналист тöдö ассьыс дон дай лыддьысьысь ёртсö сьöм ради некор оз вузав.

Лыддьöй «Коми му», «Чушканзі», «Войвыв кодзув», «Йöлöга», «Би кинь»... Тайöяс оз ылöдлыны, комиыд ылöдчан моданас, слабог, абу на пежасьöмаöсь.

Григорий ХАТАНЗЕЙСКИЙ.