Мый вылö да уна-ö видзöмаöсь сьöмсö

«Коми му» газет редакцияö шыöдчисны Кöрткерöс районын олысьяс, кодъяс элясьöны, мый налысь керкасö капитальнöя дзоньталігöн веськöдлысь компанияныс видзöма коланасьыс тöдчымöн унджык сьöм. Найö юалöны, кытчö колö шыöдчыны, медым стöча артавны, мый вылö да уна-ö сьöм видзöмаöсь налöн керкаын ремонт вöчигас.

Вочакывсö сетö «Коми йöзöдчан керкаысь» директор, юрист Вячеслав Попов:

–Оланін кузя кодекс серти уна патераа керкаын олысьяслы, сідз шусяна собственникъяслы, кодъяс асэмбуралöмаöсь либö ньöбöмаöсь патерасö, öтув чукöртчылöмöн быть колö бöрйыны, коді кутас веськöдлыны налöн керкаöн: асьныс олысьясыс, ТСЖ либö веськöдлысь компания. Сэк жö кöть кор найö вермасны вежны асланыс керкаöн веськöдлысьсö, бара жö та могысь öтув чукöртчылöмöн.

Кыдз тыдовтчис, редакцияö шыöдчысьяслысь олан керкасö дöзьöритö веськöдлысь компания. И сыкöд та кузя быть колö вöлі кырымавны сёрнитчöм сы йылысь, кор да мый колö вöчны тайö компанияыслы, тшöтш и кыдзи кывкутны, оз кö збыльмöд ассьыс уджмогъяссö.

Веськöдлысь котырыслы быд во первой кварталын колö юöртны сыöн дöзьöритан керкаын олысьяслы, мый вöчöма накöд сёрнитчöм кузя. Но йöзыс асьныс вермасны кутны син уланыс, кыдзи уджалö веськöдлысь организацияыс, а сідзжö та могысь позьö медавны аудиторöс, ЖКХ кузя мукöд специалистöс.

Веськöдлысь компанияыс кö кикурöда вöчö ассьыс уджсö, торйöн кö, керка дзоньталігöн таргайтö сьöмсö, уна патераа керкаын олысьяс вермасны шыöдчыны асьнысö дорйöм могысь прокуратураö, тшöтш и судö.